Tarxeta de embarque

Cala o silencio ó silencio.

E implosiona na penumbra

cos refrexos cruzados

das nosas miradas.

As palabras agóchanse entre a roupa

que como un axeitamos na maleta.

Pranto desnudo.

Polizóns para a viaxe.

Trovadoras,

que me cantarán o noso

-[que é]

é fora de ti e min-

cando a proa se sumerxa con violencia entre as ondas.

Espertamos á Lúa co son do click que pecha a saída.

O noso,

que teme á traizón dun romance salgado

brilará polos Océanos,

entre Casiopea e a Cruz do Sul.